 منتدى ماجده  أضف للمفضلة
|
|
 كلمة مرور المنتدى
كلمة مرور مكتوب
|
 |
 |
 |
||
|
|
|
||
 |
|
 |
|
|
||||||
منتدى القصص والروايات يختص بالقصص والروايات .. لأخذ العبرة منها |
 |
|
|
LinkBack | أدوات الموضوع |
02 -03 -2005, 08:35 AM
|
#1 (permalink) | ||||||||||||||
|
خالتي ساره زلقت في الطين
من سنين طويله كنّـا ساكنين في ( الـدّحـــو ) واحد من حواري الرياض القديمه ( ياقربه من المعيقليه وسوق مقيبره ).. شاله السيل حتى اهله ماعد يذكرونه .. وحوينا ( بيتنا ) في رفاعه كانت جدتي ماتحب تجينا عشان الطلعه تتعبها وتقطع نفسها واذا جت لمّنا تقعد تليّن كل شوي ... واذا شافها قصيرنا العيّار ابو راشد قعد يصوّت لها : وشلونك يام سعد.. ما ودك اشيلك ؟ .. وترد عليه جدتي : ماتخلي عنك العياره يابو راشد .. وتواصل طريقها لبيتنا كانت تجي عندنا خالتي ساره وبعض الايام ترقد عندنا .. كانت تحب امي واجد وماتقدر عنها ... وجدتي دايم تلاغيها وتهوش عليها : وش يقعدك عند فطيمه ( امي ) تحسبين نفسك توّك صغيّرة ... تراك فصختي الخمصطعش ودخلتي في الصطعش .. ماغير رايحتن جايه قدام الرجال .. ( تقصد ابوي ) واعيباه مير لاحيا ولا سمت ... ترد عليها امي : وش فيها يمّــه ابراهيم ( ابوي ) مهوب يقعد معنا ... اما في المسيد او عند اخوياه . جدتي : ايه مايخالف ... ادري انّ ابراهيم رجالن عاقل ... بس وش يقعدها كل هالوقت .. تجيكم بالنهار ومسيّــــان تعوّد ... لاتمرح عندكم. ردّت خالتي ساره : انشالله يمّه خلاص ( والتفتت على امي وقالت : فطيمه صبي لمّي قهوه ابروح اجيب القدوع ( التمر ) . بيت جدّاني في نفس الحارة نروح له على رجلينا .. ودايم امي او خالتي يرسلوني اجيب والا اودي لبيت جداني : شعيله ( تصغير مشاعل ) روحي ودي ذا لمّي . ... شعيله ... روحي جيبي غرض من عند امي ( جدتي ) وكانت خالتي ساره اذا جت بتروّحني تلبّسني درّاعتي ( فستاني ) وكنادري وتواسي شعري .. وتعطيني الغرض وتوصيني : امشي جنب الساس ( الجدار ) وانتبهي لايطيح .. وياويلك انطاح ... وانا اهزّ راسي موافقه ومأكده انه مهوب طايح واني ابانتبه .... وماتنسى امي تكمّل الوصايا : ايّاني وايّاك تحاكين الصبيّان والا تحارشينهم ترا اطقّك .. وكنت اروح واجي وانا مغيبتن الوصاة ... حتى طول السكة ماألتفت .. وخالتي ساره تقعد عندنا طول النهار واذا جا المغرب .. كبعت ( لبست) بشتها وحطّت شيلتها وراحت لبيت جداني في يوم من ايام الشتا نزل علينا مطر قوي عقب العصر صارت المرازيم تصبّ مثل البزابيز و السكك صارت مناقع .. وقامت وحدتن من الحجر .. تخـــرّ .. قمزت امي وخالتي يطلعون منها القش .. ( منقد تـــنك ( مشب ) والدلّه والبيز والغضاره ومساند تبن وفراش جدتي ترقد عليه اذا امرحت عندنا وامتلى كله مويه .. التفتت امي على خالتي وقالت لها : مافيه فايده ياختي روحي انتي ومشاعل لحوينا( بيت جداني ) ونادي ابوي ( جدي ) يعاونّا ..ويسد هالفتحه اللي تخرّ ... ــ وناظرت الباب وقالت : الله يعقلك يابراهيم ( ابوي ) مدري وين طسّ مهيب عادته .. ( كبعت ) لبست خالتي بشتها وعطتها امي شمسية ابوي اللي شراها ذيك السنه يوم راح للحج ... مسكتني خالتي بيدي وظهرنا والدنيا تصب وتهب والشارع مافيه الا ناسن شويين .... اللي حاطن على راسه خيشه واللي ماسكن مسحاة يوخر الطين عن بابه .... وخالتي قاضبتن الجدار وتمشي شوى شوى .. وتلتفت علي : انتبهي يامشاعل لاتزلقين ... دخلنا سكة جداني .. وانا اناظر مواطي رجولي عشان ماازلق .. مارفعت راسي الا على صوت رجالن يصيح : بسم الله عليك قومي مالك الا العافيه .. رفعت راسي وشفت خالتي زالقه وطايحه .. اثرها حطّت رجيلتها على زلق تحسبه قاسي ومادرت الا وهي منسدحه وسط السكه ... وجا ذاك الرجال ( الله يذكره بالخير ) ورفع خالتي وهويسمي عليها ويقول لها : عسى ماتعوّرتي ... وخالتي مستحيه ولا حكت ... وامتلا بشتها طين والشمسيه انعفطت ... وراح الرجال وطـــلّع نعلتها من الطين وعطاهياه وقعد يهوّن عليها الامر : بسيطه يابنيتي زال الشر . وخالتي تقول : الله لايعيد هالطلعه ... كلّه من امك. ثمّن التفتت علي وحذّرتني : شعيله .. شوفي تعلّمين احد اني زلقت بالطين ... ترا اموّتك...قلت : مانيب معلّمتن احد . وصلنا بيت جداني .. واشوى لقينا جدي .. وجا... معنا وقام باللازم وسدّ الشق اللي بالسقف ... بس امي انتبهت لخالتي من اول مادخلنا وقالت لها : سويره .. هوه .. عسى مانتيب طايحه . والله ياوخيتي بشيتك يعلّــم عليك .. الله لايعيدها من روحه . خالتي سفهتها وراحت تركض للمطبخ وحطّت بشتها في الطشت وقعدت تفركه .. وسمعتها تناديني : شعيله ... مشاعل .. تعالي .. وجع . اكيد تبغاني اقعد معها عشان ماأعلّم امي ... بس امي درت انا وش وخصّني .. انا ماقــلت لحـــد ان ...... خالتي ساره زلقت في الطين ... هديه : اذا كنت في كل الامور معاتبا صديقك لم تلق الذي تعاتبـــــــــــه فعش واحدا أو صل اخــــاك مقارف ذنب تارة ومجانبـــــــــــــه اذا انت لم تشرب مرارا على القذى ظمئت واي الناس تصفو مشاربه ومن ذا الذي تُرضي سجاياه كلّهــــا كفى المرء نُبــلاً ان تعدّ معائبـــــه
|
||||||||||||||
|
|
|
|
26 -08 -2006, 01:22 AM
|
#2 (permalink) | ||||||||||||
|
رد : خالتي ساره زلقت في الطين
الله يعطيك العافيه اخوي سعود اكثر من رائع .....هذي القصص التى افتقدناها بأسلوب اهل الرياض القديم ....واسراحه انا ماشتركت في هذا المنتدى الى علشان روايات سعود عبدالعزيز ....المزيد
|
||||||||||||
|
|
|
|
26 -08 -2006, 08:16 AM
|
#3 (permalink) | |||||||||||||||||||||||||||||||||||||
|
رد : خالتي ساره زلقت في الطين
ــــــــــــــــــــــــــــــــــــــــــــــــــ ـــــــــــــــــــــــ اخي الكريم .. اشكر لك رأيك واعتز به ... وكما تفضلت هناك الكثير من هذه ( السوالف ) الشعبيه ... وانا معك بضرورة طبعها لتكون في متناول الجميع لأن البعض في مجتمعنا لايتعامل مع الأنترنت اما من ناحيه اقتصاديه او مزاجيه ... وبإذن الله سوف اطبعها في كتاب متى ماتوفرت الأسباب وانتفت الموانع ... للتواصل ايميلي بالمنتدى ... دمت بخير سعود القويعي ـ الرياض
|
|||||||||||||||||||||||||||||||||||||
|
|
|
|
27 -08 -2006, 07:07 AM
|
#4 (permalink) | ||||||||||||
|
رد : خالتي ساره زلقت في الطين
هلا وغلا سعود
مشكوررررررررررررررررررررررررررررررررر على القصه الرائعه اللي قراتها هناك وليس هنا والله لك وحشه وينك ماصرنا نشوفك الحمد لله اني لقيتك هنا ودمت اخ عزيزا هنا وهناك
|
||||||||||||
|
|
|
|
27 -08 -2006, 10:31 AM
|
#5 (permalink) | ||||||||||||||
|
رد : خالتي ساره زلقت في الطين
الأخت العزيزه ( سعوديه وافتخر ) : ياهلا بك تلاقيني دايما هنا وهناك ... في كل المحافل اللي تستاهل ... لكن تلاحظين ان تواجدي هناك قليل جدا اشبه بالأنسحاب ... لأنه يوجد هناك عقليات لاأحب التعامل معها يعتبرون المنتدى ملك خاص و( صكّــه في مخابيهم ) ! وعند تجوالهم في المنتديات يرون بعض مواضيعي المنشوره ( هناك ) فيصرون حكمهم علي بالنقل فقط لمجرد اختلاف الأسم بين منتدى ومنتدى ! دون سؤال او تيقن وكأنهم اكتشفوا الذره ! ان المنتدى يفترض فيه ان يكون منبرا مفتوحا للجميع ... لهم الحق في نشر افكارهم ومواضيعهم دون رقابة من احد الا من خالقهم ثم ضميرهم واحترام نواميس المجتمع ....فلاعقود بيننا ولامقابل لما ينشر. وبإمكانك الرجوع الى مواضيعي هناك لتعرفي الأسباب ... للأسف ياأختي هناك نوع من البشر يفرشون لك اسباب الأكتآب والقرف ؟! استمتعي معي هنا ومؤكد ستجديني في مكان آخر ... غير ( هناك )دمتي بخير ابوجمال ـ الرياض
|
||||||||||||||
|
|
|
|
| أدوات الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| الحامل تأكل الطين و الرمل | هلا | الطب والصحة | 16 | 15 -05 -2008 09:29 PM |
| المرأه عندمـــا تحـــب ( الفصل الثانــي ) | سعود2010 | منتدى القصص والروايات | 10 | 24 -10 -2007 06:16 AM |
| المـرأه عندمـــا تحــب ( الفصل الأول ) | سعود2010 | منتدى القصص والروايات | 10 | 07 -10 -2006 12:04 PM |
|
الساعة الآن 10:32 AM.
منتديات ماجدة جميع الحقوق محفوظة © 2009 . إحدى خدمات شركة
مكتوب.
العاب شمس - العاب وصلات - العاب بنات - الفراشة - عالم حواء - الحياة الزوجية - طيران - سفر - كورة - ابراج – حظك اليوم - اخبار - كليبات - العاب فلاش - التنمية البشرية - زواج – بنت الحلال |
