رد: على طاولتك الخاصة ( نجم أنت فى سماء الإبداع )

طاولتى الخاصة اليوم
الطاولة الشعرية
ضيفى الكريم هو الشاعر المبدع عبد الرحمن الأبنودى ..... شافاه الله وعافاه




وهو ذاك الذى لايخفى إبداعه على أحد
لكن اليوم هو ضيفى كأب وأستاذ أشرف ببنوته الأدبية لى ... فهو كإنسان رائع التواصل تستكين نفسك لمحاورته .... وتطيب نفسك بنصائحه ...... له أسلوب ساخر لا يتخلى عنه حتى فى اللقاءات الإعلامية
وهو مايميز شخصيته ويثريها فى نفس الوقت .... متزوج من الإعلامية نهال كمال
وله منها لإبنتان ( آيه طالبه بالجامعة الأمريكية )
ونور تلميذة بالمرحلة الثانوية
يعشق كل ماله صلة بالأرض ............ معاناته على كل المستويات حفزت لديه طاقاته الإبداعية
وخلقت منه شخصية متوازنه على المستوى الإنسانى
له أفكاره السياسية التى قد أختلف معه فيها .. لكن يظل إحترامه لأفكارى وإنتماءاتى منطقة خاصة بى وحدى ...........
كيف تم لقاؤنا أو التعارف بشكل عام ؟؟؟؟؟؟؟؟؟؟؟؟؟؟؟
تم ذلك بعد نشرى لقصيدة أهديتها إياه فى عيد ميلاده ,,, بجريدة الجمهورية المصرية
فما كان منه إلا أن إتصل بأستاذى الدكتور فتحى عبد الفتاح مسئول الصفحة الأدبية حينها ,,, وسأله عنى ليشكرنى ... ومن هنا بدأ التعارف وتوالت اللقاءات الأدبية التى قدمنى خلالها لجمهوره ... ونشأ بيننا الرابط الإنسانى الجميل الذى يتواصل فيما بيننا حتى الأن
هذا هو ضيفى وأستاذى العزيز
الذى أدعو أصدقائى الأعزاء جيهان وبركات لنتشارك جميعاً فنجاناً من القهوة على شرف حضوره الإعتبارى
منى كل الود
آمال


السيرة الذاتية
بدأ كتاباته الشعرية باللهجة العامية منذ صغره ونظم عدد من القصائد الوطنية، عاصر جيل الحداثة في مصر وشهد تحولات سياسية واجتماعية مختلفة في عهد عبد الناصر وأنور السادات ووجه انتقادات إلى كلا النظامين بقصائده الساخرة، إلا أنه ما زال متحمساً وموالياً للرئيس الراحل جمال عبد الناصر.

أسس مع معاصريه من الشعراء المصريين حركة أدبية متميزة برزت فيها اللهجة العامية والتاريخ الشفاهي بشكل رئيسي.

عضو لجنة الشعر في المجلس الأعلى للثقافة في مصر.

كتب في عدد من الصحف والمجللات الدورية المصرية ومازال مستمراً.

من مؤلفاته الشعرية:
- الأرض والعيال، صدر عام 1964، 1975
- الزحمة صدر عام 1967، 1976
- عماليات صدر عام 1968
- جوابات حراجي القط 1969، 1977
- أنا والناس شعر 1973
- بعد التحية والسلام 1975
- السيرة الهلالية وتتضمن أربعة أجزاء هي على التوالي:
- خضرة الشريفة
- أبو زيد في أرض العلامات
- فرس جابر العقيلي
- حروف الكلام ديوان شعر


وصدر له أيضاً ما يسمى ب‍(رواية شعرية) بعنوان (أحمد سماعين) عام 1972، وثم صدر (شيء من وعي سيرة بني هلال، ترجمها إلى الفرنسية الطاهر فيفة عام 1978).

وللأبنودي أيضاً عدد من الدراسات الأدبية التي تبحث في التراث الشفاهي و الموسيقي لمصر ومن أهمها كتابه (غنا الغلابة) دراسة عن الأغنية و القرية.

أدى عدد من المطربين أغنيات من كلمات الأبنودي وبخاصة خلال حربي 1967، 1973 وكتب قصائد وطنية وقومية لفلسطين والقدس وما زال متمسكاً بمواقفه القومية الثابتة ويتابع إبداعاته ويساهم في إحياء الأمسيات الشعرية في عدد من المنابر الثقافية في الوطن العربي.






قصيدة ............ يامنة
من أروع قصائد عبد الرحمن الأبنودى
والله وشبت يا عبد الرُّحمان ..
عجّزت يا واد .؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان.
عشت كتير.
عشت لحد ماشفتك عجّزت يا عبد الرحمان.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمان.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو.....ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت.
طيِّب يا زمان..!!
إ
إوعى تعيش يوم واحد بعد عيالك
إوعى يا عبد الرحمان.
في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.
ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب..!!
قِدِم البيت.
اتهدت قبله بيوت وبيوت.
وأصيل هوه..
مستنيني لما أموت..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟
حاجي ياعمة وجيت..
لالقيت يامنة ولا البيت ..!!

***************

القصيدة الممنوعة للأبنودى
*************
أنا المصري....كريم العنصرين
سليل المخلصين ... المؤمنين
وحامى الأمة في وقت الشدايد
وشقاق السكك للواردين
ودمى ملك ليكم أجمعين
أنا المصري كريم العنصرين

أنا المصري كريم العنصرين
فقدت العقل والصوت والايدين وبعد ما كنت نجده وروح ووقفه
مانيش عارف نسيت دا كله فين
مين اللى سلبني أسمي مين؟؟
أنا المصري كريم العنصرين

وكنت اصرخ اطفي النار بصوتي
ويحيى امتى في الشده ..... موتى
فمين اللى كتب عار في جبيني
ومين اللى سرق شعلة سكوتي
وأنا اللى غنايا صحا العالمين
أنا المصري كريم العنصرين

أنا متباع ...ماهيش عادتك يا وطني
عدو..لعدو .. مين ماقبض شتمني
صبى البقال يتاجر في الضما ير
واحلا عمري ضاع مستني زمني
بقينا بصمتنا الموت متكتفين
أنا المصري كريم العنصرين

كان الوحل..شد الرجل منى
أنوح أبكي وأنا قاصد أغني
وواقفين ع الشطوط بأيادي سودا
محال هيغرقونى غصب عنى
ولو نصبوا فى قلبي ميت كمين
أنا المصري كريم العنصرين

بنيتها من الهرم للسد .. يدي
بنتها كلها ف لحظه تحدى
وكنت زعيم نبيل ما بين جفارا وتيتو وكاسترو ونهرو وغاندى
ومش محتاج أقول أنا كنت مين؟؟
أنا المصري كريم العنصرين

وكان يخطب تصيب الدنيا ربكه
ومن لبنان يعود اسطول أميركا
ولينا في الوجود كلمه ومكانه
واخوة فى الأمل ....دمعه وضحكه
ورقابينا الابيه...مرفوعين
أنا المصري كريم العنصرين

وجونا اللى رمونا...للمهالك
تقول"لاه:يقو لولها وانتي مالك؟؟
تقول لبنان..احبابنا الأعزه
يقولوا يغوروا ...وتغوروا كذلك
نسيت من همي أبقى ازاي حزين
أنا المصري كريم العنصرين

وبعنا كل شىء ينباع ...بدقه
بشفافيه ومن غير إي سرقه
ونظرنا لعلم النهب صرنا
بننهب كل شىء .. لكن برقه
بقينا دكاتره وسط النشالين
أنا المصري كريم العنصرين

زمان كان فيه ملك فاحت روايحه
وثوار جيش بروحهم يومها .. ضحوا
وكان لينا شاءن حتى في الهزيمه
وطن..كان يعجبك جمعه وطرحه
علينا عين..واقي الأمة عين
أنا المصري كريم العنصرين

وعاد تانى الملك يحكم بلاده..
ومن بعد السنين دي ...زاد فساده
وكنا ساده فوق ارض الكنانه
واصبحنا عبيده .....أو عباده
وضاع في الزحمة مشوار السنين
أنا المصري كريم العنصرين

وتانى يا فقير عاد من يخونك
وتتهان في بلادك عيني عينك
ولا الدين مكتفى من مص دمك
ولا عارف ديونهم من ديونك
وجيت للحق؟؟,,كله سلف ودين
أنا المصري كريم العنصرين

وده يسلم لده والعصر فاجر
وتاجر حنت..سلمنا لتاجر
وأم الأمة مصر الإنسانية
بتتآمر..وبتدارى الخناجر
وكنت النجده واستنجد بمين
أنا المصري كريم العنصرين

وكنت اصرخ ..وكان الكل يسمع
أمد الإيد ..عدو الأمة يرجع,
وجاني النطع يأمرني ويشخط
وخلاني بقيت في الحق انطع
أنا إلي كنت اصحي الغفلانين
أنا المصري كريم العنصرين

وكانوا يقولو"مصر"الشمس تطلع
وتعلا رقابنا فوق..وعيوننا تلمع
وكنا نشيل قلوبنا فوق كفوفنا
ويصدرونا نواجه أي مدفع
فمين ساعدنا ع الوضع المهين..؟
أنا المصري كريم العنصرين

وازاي النهارده الدم.عومي
مقلقل صحوتي وساكن في نومي
دمأنا بتشتعل في ارض غزه
ولبنان نارها ماسكه في هدومي
وأنا اللى في الأسى واقف ما بين
أنا المصري كريم العنصرين

ولولا الأنظمة العربية لامت
وفى صفوف العدو حتكون وكانت
ما كان الموت عرف "صيدا" و"بعبدا
ولاكانت قيامه الغدر قامت
ولا قلب العرب بيت حزين
أنا المصري كريم العنصرين

وشوف لبنان بترحل من جنوبها
ونوم الليل.. ما بيعرف جنوبها
سطور النمل زاحفه للملاجئ
وريح الخونه ما هدت هبوبها
ألوف راحلين في قلبي مذعورين
أنا المصري كريم العنصرين

فيا لبنان أنا..م اللى خانوك
يا حزب الله حكامنا باعوك
يا صاحبي..ما عدنا نملك غير هتافنا
هتافنا.مر مالي رقابنا شوك
وعلني..بنفس الفعل المشين
أنا المصري كريم العنصرين

يا نصر الله ده..زمن البياعين
وانت طلعت الأمة منين؟؟
تفكرنا بكل اللى نسيناه
أظنه صعب يصحوا الميتين
وخليتنا الجميع متفرجين
أنا المصري كريم العنصرين

مازال العدو نفس الخبيث
أبونا مات وسابهو ه لنا وريث
ومهما يلف ويدور ..راح يغور
واسأل عندنا بيوت السويس
حلاوة روح..وحياه الحسين
أنا المصري كريم العنصرين

بقت رايتك خلاص رمز لجهادك
بقت رمز المقاومة في بلادك
ولبنان كلها بايته في ضميرك
خلاص صبح الجهاد ماءك وزادك
لغير المسلمين والمسلمين
أنا المصري....كريم العنصرين

بلاد الأمريكان احنا وصهاينة
وصمتي ع اللى حاصل...كله معنى
مازال الحلم لم فارق دمايا
على رغم اللى عاشه طعنه .. طعنه
يا لبنان الكرامة ....لا تلين
أنا المصري كريم العنصرين

ويا لبنان ما تطفيش نار نضالك
رجالك..حتى لو ماحناش رجالك
بحور الدم ماتغرق حقوقك
ولا تكسر مجاديف احتمالك

حبيبك..بس مش قادر اعين





مجموعه رسايل الاسطى حراجى لزوجته فاطنه عبد الغفار


الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار

أسوان ... الرسالة 1

أما بعد .. لو كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب .. نساي
وعتنسى أول ما عتنزل في أسوان .. ))
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالك م الولد .. راعي عزيزه وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي

***

أسوان
زوجي الغالي
لاوسطى حراجي القط
العامل في السد العالي

جبلاية الفار

الرسالة 2

زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أيو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟
وأبا سابنا ليه يا مه ؟ ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجيما أطول قلبك
لاقطع بسناني الحته القاسيه فيه
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعيد ))
وانشالله يا حراجي ما يوريني فيك يوم
وانشالله تكون تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي

زوجتك
فاطنه أحمد عبد الغقار
جبلايه الفار

***
أسوان
الرساله 3

الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .

زوجك لاوسطى حراجي

***
أسوان
زوجي الغالي
لاوسطى حرجاي القط
العامل في السد العالي

جبلاية الفار
الرسالة 4

وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..

زوجتك
فاطنه أحمد عبد الغفار
جبلاية الفار

***
الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أسوان
الرساله 5

مشتاق ليكي شوق الأرض لبل الريق ..
شوق الزعلان .. للنسمه .. لما الصدر يضيق
مشتاق .. وإمبارح ..
قاعد .. قدامي عِرق حديد.. وف يدي الفحار ..
غابت عن عيني الحته اللي أنا فيها..
وغابوا الأنفار
تحت النفق .
الضلمه يا فاطنه
بتساعد على سحب الفكر
..
تلاقيكي ولا عارفه الأنفاق.
ولقيت نفسي يا فاطنه طيره مهاجره
والطيره جناحها محتار
ولقيت نفسي على بوابة جبلاية الفار ..
باخد الأحباب بالحضن
كانس كل دروب الجبلايه بديل توبي
طاوي كفوفي وباخبط بيهم على صدر الدار
قلتلي لي مين ؟
مسيت الدمعه ف حزنك بإيدي..
مسيت الدمعه اللي ف حزنك ..
ماعرف خدتك في حضاني ولا إنتي خدتيني ف حضنك
وعزيزه وعيد حواليا بيشدوا الجلابيه
ويشموا ف غيبتي وفي إيديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعه .. وقف اللمهندس على راسي ..
ولمس كتفاتي بصابعه .. قمت لفوق ..
طبطب على كتفي ..
وخدني من يدي بره النفقات في النور ..
ضيعنا نص نهار ..
وسألني .. قلت الشوق
قاللي إسمع يا حراجي أقولك ..
ويا فاطنه قعد يحكي ويتكلم ..
ألقط كلمه وميه تروح ..
وكلام .. م اللي يرد الروح ..
وحكى لي عن أسوان والسد ..
وحكى لي عن اللفرنج وعن حرب المينا..
في الجوابات الجايه يا فاطنه عاقولك وإحكي لك ..
اما عن نفسي .. فأنا لا بخيل ولا شي ..
كيف اللي ف قلبي بس يا ناس .. أرويه في جواب .. ؟
أما عن عيد ..
فأنا من بدري يا فاطنه قلت يروح الكتاب ..
وأقل ما فيها ..
عيفُك الخط ويحفظ له كام سوره
والأمر ده بس يا فاطنه يعوز شوره .. ؟
على خيرة الله ..
ووصلنا فطيرك ..
قعمزت ما بين الرجاله وكلناه ..
يعني أنا دقته .. ؟
والنبي بعنيا قعدت أتفرج ع الرجال بياكلوه
كنا طالعين م الشغل نشر عرق ..
بت يا فاطنه ..
النبي في الدنيا .. ما فيه واحده بتسوى فطيره زيك ..
شفت ده في عنين الرجاله ..
سلاماتي لكل اللي يقولك شحوال حراجي
وسلامي لعزيزه وعيد ..
أما نه عليكي لحين ماجي ..
زوجك
لوسطى حراجي

***
أسوان
زوجي الغالي
لاوسطى حراجي القط
العامل في
السد العالي

جبلاية الفا ر
الرساله 6

أما بعد ..
فنعرفكم .. إحنا بخير ..
ولا يلزمنا إلا رؤية وجه الغايبين ..
(( مرزوق البسطاوي )) .. مرته وضعت .. حدفت ولدين
وجوابك وصل الجبلايةإمبارح ..
لكن مرزوق .. ما سرحشي غير اليوم ..
وما دنتو في صحه وعال ..
إحنا ما يلزمناش .. أكتر من ورقه في ظرف ..
ناس الجبلايه كبيراً وصغيراً عاوزين رؤياك .
قوللي يا حراجي بحق ..
عامل كيف بس ف ليل الفرقه .. ؟
واللهي ما خش دماغي حاجه من اللي كاتبه في الورقه ..
ويا خوفي عليك ..
بيقولوا فيه ناس .. ماتوا في اللي إسمه السد ..
طمنا عليك يا حراجي .
.........................................
قسمنا مع بيت العطار .. بلح النخله الشرك ..
إذا كان لازمك منه يا حراجي .. إبعت قول ..
مش راح تاجي .. ؟
طالقالك في البيت فروج ..
علشان لما تعود م الأسوان دي .. تلاقي لك حتة لحم ..
وإم (( علي أب عباس )) مشغوله عليه ..
بدري ما راسلهاش ليه ؟
أهي طول اليوم .. قاعده على العتبيه إيد على خد ..
وماسمكه عود قش بتبكي وتخطط في تراب الدرب ..
طمنا عليه يا حراجي يرضيك المولى ..
وإذا كان عال وف خير ..
الضحك مع الجدعان .. ولا رساله لامه المشغوله أولى .. ؟
قلب الأم أصابه الشوق يا بوعيد ..
يبقى أسخن من رمال القياله لما يقيد
يبقى عش خراب بيسرخ على طيره ..
وعلى أب عباس عارف أمه ..
مالهاش في الدنيا غيره ..
وإمبارح كانت وسط الحريمات ..
قاعده تمسح دمعتها .. ف طرحتها وتقول :
اللي مانعني من الموت ..
اليوم اللي أشوف (( علي )) فيه متهني وفاتح بيت ..
يومها أقول للدنيا ضحكت عليكي
خلاص غوري ..
........................................
قولله يشيع يا حراجي .. الناس زعلانه ..
كل الجبلاي واخده في خاطرها منه ..
وإمه عنيها كستها الدخانه ..
أختك (( نظله ))
رجعت بيت الحاج ركابي إمبارح من (( درجا ))
قالت جايه تريح عند خالاتها وحتولد في اللي يهل ..
يا حراجي .. جوابك بيرد الميه للزور الناشف ويبل .
ده إحنا عايشين هنا ع السيره ..
وزادنا الأخبار ..

زوجتك
فاطنه أحمد عبد الغفار
جبلاية الفار

__________________

البحث عن مواضيع لنفس العضو

__________________

العاب بنات

من مواضيع آمال البرعي في المنتدى:

الأن أزهو بعمرى
إمرأة مُعلبة
قبل إرتكاب حماقتى
نقطة. ، فاصلة
برد كفوفك
أول سطر من عمرى
أول الحواديت
خاتمك ليس محبسُها
رجل الأهـــــــــــــــــــواء
هل تدرك مسئوليتك الإجتماعية ؟؟؟؟؟؟؟؟
لجنتى عاود
معنى جديد للإنتظار
كونى لىَّ ند
أدخلينى من حاراتى
مناوشات قصصية ( 2 )