منتديات ماجدة

منتدى ماجدة هو منتدى عربي متكامل يحتوي على الكثير من الفائدة وهو أحد مواقع شبكة منتديات !Yahoo مكتوب. ، انضم الآن و احصل على فرصة التمتع بحوارات عربية متعددة المجالات



+ الرد على الموضوع
النتائج 1 إلى 4 من 4
  1. #1
    Banned معشوق is on a distinguished road الصورة الرمزية معشوق
    تاريخ التسجيل
    03-09-2006
    المشاركات
    84
    ‎تقييم المستوى 0

    افتراضي افترض لو تزوجت فتاه برازيلية .. بدال ما اتزوج من بنات بلدي وش بيصير

    أعزائي
    أسمحولي أعرفكم اولا عـلـى خـطيـبتي الجميلة ثم انا ، وهي من البرازيل ، واسمها "مارغريتا" .
    وتراها تسلم على كل اللي المنتدى وتقولكم : لوف آند بيس (love and peace) .
    وعلى فكره هي ماتعرف تتكلم عربي إلا كلمتين ، تعرف تقول : كيف هالك ؟ و هـبـيـبـي ، طبعا قصدها تقول : كيف حالك و حبيبي ،( أموت بلثغة لسانك يابنت ).

    أنا خلاص قررت أتزوج من "مارغريتا" وهي بتكون زوجتي وأم عيالي في المستقبل ،
    وصدقوني أنا ما إخترت الإنسانة هذي (من الباب للطاقة) !
    بصراحة أنا تعبت من البحث والتدوير على بنت أكمل بها نصفي الثاني ، وبعد جهد جهيد قابلت "مارغريتا" في مكان ما و أحسست بالحب من أول قطرة .... قصدي من أول نظره . أعزائي !
    أنا شاب ولدت ونشأت وترعرعت وتمرغت على أرض " نجد".
    وكنت أشوف أنه بنات السعودية أحسن بنات للزواج ، فأنا أحب الإنتاج الوطني ، وطول عمري وأنا أكل "دجاج الوطنية" وأكــره "دجاج فقيه" .

    وبصراحة من يوم كان عمري تسع سنوات وأنا أتلفت يمين ويسار وأقزقز بالبنات (الولد عينه زايغه من بدري) لكن كان القصد شريف وهو الزواج ،
    وعلى قولتهم (الذيب مايهرول عبث ولازم تخطط على الفريسة من بدري ) .
    بالأخير باءت كل محاولات السنين الماضية بالفشل ، وطارت الطيور بأرزاقها ، وأنا ماغير أهرول وأهرول مثل :ذيب مصلوخ بيوم عجاج .
    وصرت كل ماتذكرت هالسنين الماضية تجيني نوره الهوشان –الله يرحمها- تقول :

    اللي يبينا عيت النفس تبغيه ---- واللي نبي عيا البخت لا يجيبه
    المهم ، قلت أنا لنفسي :: يا"شيطاني" أترك عنك كثر المطامر وقلة الحيا ، وإذا بغيت تتزوج أدخل البيوت من أبوابها .
    عندها قررت (ياكثر قراراتي) أقول : قررررررت إني أروح وأهمز رجلين أمـي.

    المهم رحت ذاك اليوم ومسكت رجلين أمي علشان أهمزهن،،
    أمي بدأت تضحك . تحسبني بأدغدغها ،،
    قلت لها : يمه بأهمز رجلينك لا تضحكين . الضحك بدون سبب ما يصلح يمه
    أستغربت و قالت: من يوم طلعت من بطني وأنت ماعمرك همزتني وش الطاري اليوم ؟
    على طول أنا تنحنحت وبدأت أرتل بصوت جميل ((وأخفض لهما جناح الذل من الرحمة وقل ربي أرحمهما كما ربياني صغيرا))
    قالت أمي : صدق الله العظيم ، الهادي بالسماء

    قلت أنا : صحيح صحيح الزواج قسمة ونصيب . (ألحقوا علي تراني بديت أخرف )
    قالت أمي : "وشو" ورفستـني الله يحفظها .

    قلت أنا : إيه يمه أنا أبي أعرس . وأبيك أنتي اللي تخطبين لي البنت بعد.
    قالت أمي :هذي الساعة المباركة أنا لي سنين وانا أنتظرك تقولي هالكلام . أخيرا قلتها الحمد لله.
    هنا أشتد الحماس بالتهميز .
    قلت : يمه ترى أهم شيئ عندي " الجمال ".
    قالت أمي : معلوم يا ولدي ، وش رايك بفلانة؟ والله يا الناس يصيحون من زينها صياح، البياض بياض نانسي والوجه مثل القمر.
    قلت : بس يمه هذي أذكر إنها - طرماء - . ماتهرج ولا تسمع
    قالت: أحسنلك علشان ماتزعج بكثرة الهرج .

    قلت : لا يمه أنا أبي إذا تزوجت أتزوج وحده أتعاطى معها الرومانسية,
    وهذي طرماء وأنتي تعرفين (( الحب من طرف واحد عذاب )).

    قالت : طيب ياوليدي أخطب لك فلانه يازين هروجها وبعدين حرمه سنعه تعجبك!

    قلت : هذيك رجالية مسترجلة ، أخاف إذا تزوجتها أنا اللي أحمل موب هي ،

    قالت : طيب فلانة !
    قلت أنا: هذيك أخبرها عرجاء.
    قالت : طيب وش رايك بفلانة !
    قلت أنا : يمه هذيك عمياء الله يهديك
    قالت : طيب وش رايك طيب بفلانه !
    قلت أنا : يمه هذيك سمينه كأنها توبيس


    قالت :طيب طيب ...... أجل مالك إلا فلانه بنت منيرة الحمد هي اللي تصلحلك
    قلت أنا: من هي ما أعرفها , وش أوصافها؟
    قالت أمي : بيضاء طويله عيونها كأنها فناجيل وشعرها يضرب ذنبها.
    قلت أنا : عسى بس ماهيب عمياء ولا طرماء ولا عرجاء ولا صلعاء.
    قالت أمي : لا لا . (وترى جسمها بعد نحيف في مناطق وسمين في مناطق)
    قلت أنا : الله يجزاك بالخير يا يمه ، بس هي اللي عليها العين ، خلاص بكره بأروح أخطبها من أهلها.

    طلعت من البيت وأنا أتمنى لو إن لأمي خمس رجول علشان أهمزها ،،،،
    يا ناس ترى التهميز أفضل طريقة لحل المشاكل بالدنيا.

    على فكرة ترى أمي جاها خلع في القدم بعد ماهمزتها ذاك الليلة ،
    معذور أنا مع السواليف
    تعرفون أنتم الزواج أنواع الحماس ماهوب بس فتح . (طراه حركة فتح وحماس الإسلامية)المهم ، بعد ذاك اليوم اللي همزت فيه أمي .
    رحت إلى بيت البنت (الفريسة ) بأخطبها ،، ضربت الجرس ، شوي ويفتحي الباب رجال طول بعرض (شكله أخوها) ،
    دخلنا بالمجلس وقعدنا ندردش شوي (يعني بعضا من النفاق الإجتماعي) .


    ثم قلت أنا : أنا جيت اليوم أبي أخطب بنتكم .
    قال الرجال : حياك الله بس للأسف ماعندنا بنات .
    قلت أنا : إلا "فلانه" هذيك اللي سمينه في مناطق ونحيفه في مناطق ، إهي تصير أختك؟
    قال هو :فلانة، زوجــــتـــي ياحقير
    ز
    و
    و
    ط


    ماراح أعلمكم وش صار بعد كذا ، حفاظا على كرامتي . ووضعي الإجتماعي المرموق . (( اللي كان مرموق))



    المهم تاهت بي دروبي
    وضاعت خطوتي
    وأمتلأت بالإحباط
    وصارت دموعي على خدي تتسابق كأنها الخيل في المضمار .
    حتى إني كل ما شربت كأس ماء يـطـلـع الماء من عيوني على شكل دموع ..
    وإذا مريت من جنب قصر أفراح فيه عرس دعيت عليهم :الله لايوفقهم .

    وسويت إضراب شامل عن الطعام لمدة ثلاثة أشهر
    وإضراب عن الشراب لمدة شهر
    وإضراب عن التنفس لمدة خمس ساعات .
    بالأخير يوم شفت أنه مافيه أحد جاب خبري ، سويت أجتماع طارئ وقررنا مايلي:

    قررت أني ما أتزوج بهالدنيا ،، إن شاء الله بالجنة ،ناخذ لنا أربع من الحور العين .
    وقلت لنفسي أصلا ( لو الزواج فيه خير كان مارماه الطير ). ولا ليش بالسعوديه فيه مليون عانس ومليون عانسه ما يبغون الزواج ........ خلك مع هالعوانس ،،، والموت مع الجماعة رحمة.

    وعشت لشهور طويلة تحت شعار ""لا للزواج"
    وصرت ما أهتم لشيئ اسمه - بنت -
    حتى ولو تمشي البنت مصلوخة من قدامي . مايهمني ولا ألتفت لها مثلها مثل الخشبة .
    وترى هالشئ ماله علاقة بالأشياء اللي صارت في مقطع " الزووط "اللي فوق والعمايل اللي سواها ذاك الرجال لا لا هذا مجرد قناعة داخلية أنه خلاص مافيه عرس ولا هم يحزنون.
    إلين جاء ذاك اليوم وهو أجمل أيام العمر ....

    في زمان هو اللازمان ومكان هو اللامكان ،

    قابلت هذيك البنت الجذابه السمراء بسمار البنّ البرازيلي ، حسيت على طول إنها نصفي الثاني . تقدمت خطوتين وتقدمت هي خطوتين ، وقلت لها : تتزوجينني ؟
    قالت: OK

    إيه نعم هذيك هي " مارغريتا " خطيبتي حالياً ،
    باقي عليكم تعرفون أنه مارغريتا (إنسانة متدينه) ، تروح لـلـكـنـيـسـة كل يوم أحد من كل أسبوع ،
    وهي إنسانة طيبة وحبوبة . باختصار هي عبارة عن (كتلة من الرومانسية) .

    بإذن الله سنتزوج في الصيف القادم ، والزواج سيكون على الطريقة البرازيلة ، مافيه لا شبكة ولاطقاقات ولا قصور أفراح ولا خرابيط ربعنا السعوديين . لاأحد يلومني على هالكلام تراني معذور خذ مثلا : لو تزوجت سعودية بأضطر أدفع 40 ألف بس حفلة زواج ، وأنا بصراحة إنسان (( أناني )) ما أحب الشغل هذا.الأربعين ألف بأصرفها على نفسي وعلى "مارغريتا" كشهر عسل في جزر الهاوي . في المحيط الهادئ
    . وبقيمة المهر أقدر أبني فيه فيلا في قلب ريو دي جانيرو.

    أعزائي !
    تخيلوا معي لو إني فرضا تزوجت من بنت سعودية . كيف سيكون وضعنا بعد عشر سنوات من الزواج؟ .
    كان تشفوني قاعد في شقة صغيرة ، و الساعة أربع العصر وزوجتي نايمه .
    وعيالي نواف يلحق سيارة البلدية بالشارع ،
    ومشعل قاعد بالحمام له ساعة ما أدري وش يسوي !
    وبناتي متبطحات عند MBC 3 لهن ثلاث أيام على هالحال ،
    وكل ماجيت أطلع من البيت يتراكضون :يبه أبي لعبه ، يبه أبي شريط سوني ، أبي أروح معك ،،،،أبي أروح لأختي (هذي زوجتي يالله أنك تخلف) .
    وللمعلوميه سأكون وقتها متزوج من عشر سنوات وأنا مازلت أسدد أقساط المهر وحفلات الزواج . ومديون إلى الغما .

    لكن إذا تزوجت حبيبتي "مارغريتا" سأعيش أنا وإياها في سعادة وهناء . أنا أعلمها كيف تطبخ الكبسة! وهي تعلمني كيف أرقص السامبا!

    وبعد عشر سنوات من الآن راح تشوفوني .. جالس على كرسي من ذهب ،
    وعيالي "رونالدينو" و"أنجلو" قاعدين يهمزون رجليني .
    وبناتي "ماريا" و"باريتا" قاعدين يرسمون منظر غروب الشمس .
    وزجتي وقرة عيني "مارغريتا" جالسة جنبي تقرأ القرآن الكريم (وقد أسلمت على يدي ولله الحمد والمنه) , وأنا في كل يوم أسعد من اليوم اللي قبله .

    The End

    وترى خطيبتي تقول لكم : مره ثانيه LOVE AND PEACE
    والفدرالي بعد يقول لكم يا بنات السعودية :LOVE AND PEACE وتراني ( آعد عم حرئصكوا دخيلكون ماتزعلو ) ورجاءا لا أحد يحرق السفارة البرازيلية


    منقول بتصرف




  2. #2
    Banned معشوق is on a distinguished road الصورة الرمزية معشوق
    تاريخ التسجيل
    03-09-2006
    المشاركات
    84
    ‎تقييم المستوى 0

    افتراضي رد: افترض لو تزوجت فتاه برازيلية .. بدال ما اتزوج من بنات بلدي وش بيصير

    ما فيه ردووووووووووووود




  3. #3
    عضو ماسي خياط المغرب will become famous soon enough الصورة الرمزية خياط المغرب
    تاريخ التسجيل
    17-01-2007
    المشاركات
    1,783
    ‎تقييم المستوى 20

    افتراضي رد: افترض لو تزوجت فتاه برازيلية .. بدال ما اتزوج من بنات بلدي وش بيصير

    هههههههههههه
    مشكور أخي على القصة ولو أني لم أفهم بعض المصطلحات




  4. #4
    عضو -نجد- is on a distinguished road
    تاريخ التسجيل
    18-05-2007
    المشاركات
    98
    ‎تقييم المستوى 15

    افتراضي رد: افترض لو تزوجت فتاه برازيلية .. بدال ما اتزوج من بنات بلدي وش بيصير

    هههههههههههه
    هذا لهجتنا مايفهموها الا السعوديين خخخخ
    الله يهديك حنى مالنا مثيل
    وبعدين حنى ماعندنا بيس نشوف ولد ديرتنا يطلع مننا ونسكت
    والله ماتعيش ماغريتا وهنك تحميها خخخخخخخخخخخخ


المواضيع المتشابهه

  1. تحدي بين الشباااااب والبنااااات
    بواسطة om janna في المنتدى الموضوعات المتكررة
    مشاركات: 1034
    آخر مشاركة: 26 -01 -2007, 08:49 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك